Bana Kaih Phase–II hnuaiah hian Lunglei District-ah CM Special Package-ah progress partner thlan fel tawh pakhat awmin, Lalnunmawia, Ṭawipui South, Ar vulh (Poultry Farming)-a hma la tur a ni a. Vawiin khan DC Office-a official-te leh AH & Veterinary Department Southern Zone Joint Director Dr Ngurzidingi Sailo te hovin progress partner tana hriat tur pawimawh hrang hrang inhrilhfiahna leh certificate inhlanna hi buatsaih a ni.

District Bawrhsap Navneet Mann chuan Bana Kaih Scheme chu Mizoram sawrkar flagship scheme a nih angin department-te leh progress partner-te pawhin tih tak takna nena kalpui a ṭul thu sawiin, a tihhlawhtlin kawngah ṭha taka thawh ho leh ṭan rual a pawimawh thu a sawi a. Phase–II dilna hawn mek chu Lunglei District mipuite'n ngaihvenin, a tam thei ang berin dil se a duh thu sawiin, dilna lut aṭangin hma la tak tak turte chu CM Special Package leh Loan Component-ah progress partner atan la thlan belh zel tur an nih thu a sawi.

Official-te chuan progress partner tana hriat tur pawimawh hrang hrang sawiin, an hma lakna kawngah department mi thiamte rawn hreh lo tur leh hlawhtling ngei tura hma lak tum turin an chah a. An hma lakna chu a theih ang anga an vil zui tur thu an sawi.

Progress Partner hnenah hian Certificate leh Placard hlan a ni a. Progress Partner Pu Lalnunmawia chuan ar a vulh chhoh dan leh hma lak zel a tum dan sawiin, progress partner-a thlan a nih avanga a lawmzia leh theih tawpa hma lak a tum thu a sawi bawk.

Bana Kaih CM Special Package ṭanpuina hi ₹50,000/- niin, progress partner-te bank account-ah Direct Benefit Transfer (DBT)-a thun tura ruahman a ni a. Certificate inhlan fel hnuah hian bank kal tlangin inpek fel nghal a ni ang.